CEBU, Philippines - Naangol ang duha ka tawo nga gikan pa namuwang sa sitio Bato, barangay Casili sa lungsod sa Consolacion apan didto kini magpatambal sa Mactan Doctor’s Hospital sa dakbayan sa Lapulapu alas 8 pasado ang takna sa miaging gabii. Si PO1 Alberto Jimenez sa kapolisan sa maong lungsod miingon nga gipahibalo sila sa usa ka nurse on duty sa maong tambalanan labot sa duha ka tawo nga pulos napusilan nga nahidangat sa ilang tambalanan.
Matud pa ni Jimenez nga ang team sa kapolisan sa maong lungsod nga gipangulohan ni PO3 Arthur Ariate nga naghimo og pakisusi miila sa duha ka mga biktima nga mao sila si Llyod Tabasa Semensia, 33, taga barangay Casili sa dakbayan sa Mandaue ug Obit Solon Santillana nga taga dakbayan sa Sugbo.
Giasoy sa duha ka biktima nga gikan sila nga nanari og manok sa barangay Lamac sa lungsod sa Consolacion ug sa ilang pagpamauli nga nagsakay og multicab kalit lang silang gipamusil sa duha ka wala hiilhing lalaki nga nagsakay og motorsiklo.
Ang biktima nga si Semensia naigo sa iyang bitiis ug naigo usab sa abaga si Santillana ug tungod sa ilang kahadlok ilang gipabulhot pagpadagan ang sakyanan paingon sa dakbayan sa Lapulapu hinungdan nga didto na sila nagpatambal sa mga samad pinusilan nga ilang naangkon. (BANAT NEWS)