CEBU, Philippines - Patay ang giingong usa ka gidudahang drug pusher ug tulisan human gikataho nga misukol sa grupo sa Provincial Intelligence Branch sa Branch I, barangay Polpogan, lungsod sa Consolacion sa alas 11:20 sa miaging gabii.
Ang namatay naila nga si Jorge Blanco, molupyo sa maong lugar.
Matud pa ni Supt. Rodolfo Albotra, ang hepe sa PIB nga nahinabi sa mga tigbalita nga nakadawat sila og alarma bahin sa presensya sa upat ka mga armado nga tawo sa maong barangay.
Sa pagresponde sa PIB pinangulohan ni Sr. Insp. Leo Logroño positibo ang maong taho apan sa pagpaila nila sa ilang kaugalingon nga mga polis giingong nanagan ang tulo apan si Blanco giingong mibunot sa iyang klaibre .45 nga pistola.
Matud pa nga gimandoan nila kini nga ipabutang ang iyang pistola apan nagmakuli hinungdan nga gipusil sa iyang tiil aron ma-neutralize.
Apan gikatahong wala gihapon kini mopatuo hinungdan nga gipusil nila kini sa lawas duha ka higayon.
Daling gidala sa Eversely Child Sanitarium si Blanco apan gideklarar na kini nga dead on arrival.
Matud ni Albotra nga narekober gikan sa biktima ang kalibre .45 nga pistola, usa ka magazine nga puno sa pito ka bala sa kalibre. 45, usa ka dakong putos nga gituohang shabu.
Matud pa ni Albotra nga mokantidad og P250 mil ang maong shabu nga nakuha gikan sa namatay.
Sumala pa ni Albotra nga si Blanco ikatulo sa drug watchlist sa ilang buhatan sa mga kaso sa pagpanulis ug ila na karong gisusi kun duna ba kini kalambigitan sa mga insidente sa pagpamusil sa norte.
Matud ni Albotra nga usa si Blanco sa target nila sa ronda sa miaging bulan apan wala kini diha sa lugar. (BANAT NEWS)