CEBU, Philippines - Si Konsehal Dave Tumulak miawhag sa kadagkoan sa Mines and Geo-Sciences Bureau (MGB) ug Philippine Institute of Volcanology and Seismology (Phivolcs) nga tug-anan nila ang katawhan sa kabukiran sa Sugbo kun asa g’yud mahimutang ang fault line sa ilang lugar. Si Tumulak miingon nga ang pamahayag nila ni MGB Senior Geologist Maria Elena Lupo ug Robinson Jorgio sa Phivolcs nga igo lang miingon nga adunay fault line sa kabukiran sa Sugbo makapakuyaw sa mga lumolupyo.
Matud ni Tumulak nga dili maayo nga igo lang moingon ang maong mga opisyal sa Phivolcs ug MGB nga peligro nga puy-an ang mao nga dapit kay dili man mahimo nga talikdan sa mga mag-uuma ang ilang gitikad nga kaumahan.
Si Tumulak misugyot nga ang tukma nga himoon unta mao ang pag-ila gyud sa sityo nga nahimutangan sa fault line.
Matud ni Lupo nga aduna gani’y fault line nga nahimutang sa dapit nga dili halayo sa Buhisan Water Dam. Ang gitawag og fault line mao kini’ng liki sa yuta o bato nga usahay makita lang pinaagi sa radar gawas lang kun molihok na ang maong bahin sa kalibutan.
Gipasabot nila ni Lupo ug Jorgio ngadto sa mga konsehal sa dakbayan nga ang fault line usahay molihok ug mahagba ang usa ka bahin niini ug hinungdan nga makamugna og linog. Sa Bohol, dunay kabahin sa fault line nga mihulpa og subra sa tres metros kon lapaw pa sa tawo ang gihabugon samtang ang dakung liki peligro nga adunay mahulog. (/EIM)(BANAT NEWS)