CEBU, Philippines - Ang Metropolitan Cebu Water District ug ang Visayan Electric Company nangita og pamaagi aron mamenusan ang impact sa pagkakulang sa power supply.
Ang MCWD nakigtagbo sa mga representante sa VECO adtong usang adlaw aron tukion ang epekto sa rotating brownouts ngadto sa mga water wells sa MCWD nga adunay 150,000 konsumidor sa Metro Cebu.
Matud pa sa tigpamaba sa MCWD nga si Charmaine Rodriguez-Kara kinahanglan nga magtinabangay ang duha ka mga utility service providers kabahin sa power interruptions aron mamenusan ang negatibong epekto ngadto sa publiko.
Si Baste Lacson, ang VECO chief operating officer mipasalig hinuon nga ang mga MCWD water pumps, hospitals ug opisina sa gobyerno nga naghatag og serbisyo maoy katapusang mawad-an og kuryente kung moubos gyud ang suplay sa kuryente.
Ang franchise area sa VECO nakasinati og pagkunhod sa suplay sa kuryente human nangaguba ang ubang transmission lines sa National Grid Corporation of the Philippines didto sa Leyte tungod sa super typhoon Yolanda.
Tungod sa pagkulang sa supply sa kuryente, ang VECO mi-implementar og rotating brownouts sugod pagka Lunes hangtud ma- normalized ang ilang suplay sa kuryente. (BANAT NEWS)