CEBU, Philippines - Nagpasiugda na og relief campaign ang kagamhanan sa dakbayan sa Mandaue aron ihinabang sa mga biktima sa bagyong Yolanda sa amihanang kalungsoran sa lalawigan sa Sugbo.
Ang subli nga pagpasiugda og relief campaign sa kagamhanan sa maong dakbayan gipahibalo ni Mayor Jonas Cortes ngadto sa mga kawani sa city hall kagahapon sa buntag human sa ilang flag ceremony.
Human niini gipasiugdahan dayon sa mga hingtungdan ang pagtigom og hinabang nga naglakip sa mga noodles, bugas, sardinas ug uban pang pagkaon.
Si Roger Paller nga maoy tigpamaba sa kagamhanan sa maong dakbayan nga nahinabi sa Banat News miingon nga gawas sa pagkaon, gikinahanglan usab sa biktima ang mga housing materials, galamiton sa kusina, plato, kaldero ug uban pa.
Dugang pa ni Paller nga gipahibawo usab nila ang mga molupyo sa kabarangayan nga adunay malumong kasingkasing sa pagtunol usab sa ilang hinabang.
Si Paller miingon nga kasamtangan nilang gipahimutang sa atubangan sa city hall ang drop in center nga bukas gikan sa alas 8:00 sa buntag hangtod sa alas 5:00 ang takna sa hapon.
Kahinumdoman nga ang kagamhanan sa dakbayan sa Mandaue unang nagpahigayon og relief campaign alang sa lalawigan sa Bohol nga nasabak sa 7.2 magnitude nga linog niadtong Oktubre 15 niining tuiga.
Mga linatang pagkaon, sama sa sardinas, bugas ug mineral water ang ilang gipadala isip tubag sa nag-unang panginahanglan sa mga nabiktima sa maong trahedya. (/WC)(BANAT NEWS)