MANILA, Philippines - Ang Visayan Electric Company mipatuman og rotating brownouts sugod alas 9:30 sa buntag kagahapong adlawa sulod sa ilang franchise area human kini nakasinati og pagkulang sa ilang suplay sa kuryente. Adunay usa ngadto sa duha ka oras ang pag-brownout ang nahitabo sugod gahapon.
Matud pa ni Basti Lacson, VECO chief operating officer sa press briefing nga gipahigayon, adunay 350mw ang demand sa suplay sa kuryente apan 310mw lang ang ilang nahatag.
Ang hinungdan sa pagkulang sa kuryente gumikan kini sa mga transmission lines sa National Grid Corporation of the Philippines sa probinsiya sa Leyte nga nangaguba. Ang VECO adunay duha ka suppliers sa kuryente nga gikan sa Leyte nga naghatag kanila og 150mw kada adlaw. Apan tungod kay ang transmission lines sa NGCP nangaguba, dili makatabok sa Sugbo ang maong supply sa kuryente nga gikan sa Leyte.
Atol sa pagkuwang sa kuryente, giawhag ni Lacson nga ang katawhan magdaginot sa paggamit sa kuryente aron dili mograbe ang kakuwang sa suplay sa kuryente. (/EIM)(BANAT NEWS)