CEBU, Philippines - Gipahibalo ni Mayor Jonas Cortes nga duha ka adlaw nga walay trabaho ang mga kawani sa kagamhanan sa dakbayan sa Mandaue gawas lamang sa mga kawani nga gikinahanglan ang 24-oras nga serbisyo sa panahon sa katalagman.
Matud ni Cortes nga ang pagdeklarar nga walay trabaho alang sa mga kawani sa kagamhanan sa maong dakbayan sa tinguha nga makahimo usab sila sa pagpangandam sa ilang mga panimalay tungod sa hulga sa bagyong Yolanda nga moigo sa Sugbo karong adlawa.
Nunot niini si Cortes mihangyo ngadto sa mga nagdumala sa pribadong mga establisamento nga ang ilang mga edipisyo nga naglakip sa mga bakanteng bodega nga magsilbing evacuation center sa mga molupyo sa kabarangayan niining panahon sa paghulga sa bagyo.
Dugang pa ni Cortes nga ang mga buhatan sa kagamhanan nga nagkinahanglan sa ilang 24-oras nga serbisyo sa panahon sa hulga sa katalagman sama sa bagyo mao ang Accident Control Emergency and Response Team (ACERT), medical personnel sa Mandaue City Hospital, City Social Welfare, City Engineering Office, General Service Office ug uban pa.
Si Roger Paller, tigpamaba sa kagamhanan sa maong dakbayan nga nahinabi sa Banat News miingon nga mihangyo si Cortes sa mga pribadong establisamento nga magsilbing evacuation center sa panahon sa pag-igo sa bagyo tungod usab kay ang pipila ka mga edipisyo nga gipanag-iya sa gobiyerno nagkinahanglan pa og tukmang pakisusi sa mga structural engineer ang mga nasinati kadaot sa miaging linog.
Dugang pa ni Paller nga kasamtangan karon nilang giawhag ang mga molupyo nga ang panimalay nahimutang sa kuyaw ang mobalhin na ngadto sa luwas nga lugar ilabi na sa panahon sa kagabhion. (BANAT NEWS)