CEBU, Philippines - Ang Mines and Geosciences Bureau kon MGB sa Department of Environment and Natural Resources kon DENR-7 nisugyot nga pabakwiton ang mga residente nga nagpuyo sa mga flood ug landslide prone areas dinhi sa syudad sa Sugbo.
Kini agi og pagpangandam sa pag-abot sa super typhoon nga Yolanda nga gibanabanang mosulod sa Philippine Area of Responsibility kon PAR karong alas 5:00 ang takna sa sayo sa buntag ug motugpa sa adlaw nga Biyernes.
Sigon pa ni MGB-7 Chief Geologist Al Emil Birador nga nahimutang sa makuyaw nga kahimtang ang maong mga molupyo sa mga lugar nga sagad mahitabo ang pagbaha ug pagdahili sa yuta sa higayon nga moabot ang bagyong Yolanda.
Base sa records sa MGB, si Birador nitug-an nga ang mga landslide prone areas dinhi sa syudad sa Sugbo gilangkoban sa barangay Lusaran, Binaliw, Guba, Pung-ol, Sibugay, Sudlon 1, Sudlon 2, Sinsin, Buhisan, Pamutan, Sapangdaku ug Adlawon.
Samtang ang mga barangay nga sagad bahaan dinhi sa syudad sa Sugbo mao ang mga barangay sa Kasambagan, Labangon, Kinasang-an, Mabolo ug barangay Bonbon.
Apan namatikdan nga ang downtown area sa Cebu City lunopan gyud gihapon sa baha panahon sa kusog nga pagbunok sa ulan.
Gihulagway sa Department of Science and Technology nga mas kusog sa bagyong Pablo nga nagbilin og kapin sa usa ka libo ka mga tawo nga nangamatay niadtong nakalabay nga tuig.
Sigon pa niini nga tungod sa kakusog sa hangin ug ulan nga dala sa nahisgutang bagyo, ang lalawigan sa Sugbo apektado niini sanglit motadlas man kini sa Kabisay-an.
Samtang sa laing bahin, daghan nang mga mamalitay ang nagpanon sa mga kamerkadohan ug grocery stores ang namalit daan og mga pagkaon alang sa ilang mga panimalay nunot niining umaabot nga bagyo.
Apan ang Department of Trade and Industry -7 mipasalig nga way panic buying nga nahitabo sa Kabisay-an. (BANAT NEWS)