CEBU, Philippines - Gikalipay ni Lapulapu City Mayor Paz Radaza ang pagdaug sa mga kapitan sa barangay sa maong dakbayan nga iyang kaalyado.
Atol sa press conference kagahapon sa buntag gibutyag ni Radaza nga tanang kapitan sa isla sa Olango ug mainland Lapulapu nga iyang kaalyado nangharus sa kadaugan.
Hinuon sa Brgy. Pajo naparot didto si Grace Estremos sa kaatbang niini nga si Junard "Ahong" Chan.
Matud pa ni Mayor Radaza nga anaa ra ni Chan kung magpabilin kining oposisyon o kaha sa administrasyon siya mosuporta.
Gumikan niini mas matagad na unya ang mga panginahanglan sa matag barangay gumikan kay anaa na mosuporta sa administrasyon ang mga kapitan nga midaug.
Usa niini mao ang Brgy. Agus diin naparot ang kanhi kapitan nga si Boy Oyao sa kaatbang niini nga si Joven Lauron sa milabay’ng piniliay.
Gumikan niini si Radaza mipadangat og mensahe ngadto sa mga bag-ong napiling opisyales sa barangay nga kalimtan na ang milabay’ng election ug mopunting sila sa mga serbisyo nga ilang ihatag ngadto sa ilang tagi- barangay.
Misaad usab si Radaza nga palamboon niya pag-ayo ang mga barangay kansang mga opisyal mosuporta kaniya. (BANAT NEWS)