CEBU, Philippines - Gidunggab patay sa caretaker sa poultry farm ang usa ka lalaki nga naaktohan nga nangawat didto sa sitio Tawagan, Barangay Poblacion, lungsod sa Medellin sa alas 9:00 sa miaging gabii.
Ang biktima naila nga si Ian Despacio, hingkod, molupyo sa sitio Tawagan, Barangay Poblacion, lungsod sa Medellin.
Samtang ang suspetsado naila nga si Eulino Pasu-it alyas Linoy, 23, kasamtangang nagpuyo sa sitio Tawagan, Barangay Poblacion, lungsod sa Medellin apan lumad nga taga Masulog II sa dakbayan sa Kanlaon, sa Negros Oriental.
Si SPO1 Orlando Batusil nga nahinabi sa Banat News miingon nga ang biktima mitastas sa pukot nga gikoral sa Jake & Jean Farm aron makasulod.
Matud ni SPO1 Batusil nga naaktohan ang biktima sa suspetsado nga nagbitbit sa manok nga igtatari nga gibantayan niini busa gigukod dayon niya kini.
Sumala pa ni SPO1 Batusil nga nakabantay ang biktima nga nakit-an siya sa suspetsado ug misulay kini og dagan palayo apan naapsan kini sa suspetsado.
Gidunggab sa suspetsado ang biktima gamit ang usa ka butcher knife sa makapila ka higayon nga maoy hinungdan sa iyang kamatayon.
Nakaangkon og samad dinunggaban ang biktima sa iyang lawas ug naigo usab ang iyang kidney ug ang tinai sa biktima.
Sumala pa ni SPO1 Batusil nga mibutyag ang Municipal Health Officer sa Medellin nga si Dr. Jude Palilio nga ang samad sa dapi-dapi, tiyan ug sa wala nga dughan sa biktima maoy hinungdan sa iyang kamatayon.
Midugang si SPO1 Batusil nga sa miaging semana adunay nitaho sa ilang buhatan nga gilungkab sa biktima ang usa ka videoke machine.
Ang suspetsado dali ra usab nga mitahan sa iyang kaugalingon sa kapolisan ug ang 13 ka pulgadas nga kutsilyo nga maoy gigamit niini sa pagdunggab sa biktima. (BANAT NEWS)