CEBU, Philippines - Patay ang usa ka 52-anyos nga overseas Filipino worker human mabangga ang iyang gimanehong Hi-Ace van sa usa ka trak de karga diha sa national highway sa barangay Abugon sa Sibonga kagahapon sa udto.
Si PO2 Paulino Sanchez, Jr., desk officer sa Sibonga Police Station sa pakighinabi sa Banat News miila sa nakalas mao si Lino Merced Aldaba, residente sa barangay Bahay, Sibonga.
Gikostudiya na karon sa kapolisan ang drayber sa trak de kargang nabanggaan sa biktima nga giilang si Lucrecio Sinugan, 43, taga Libertad, Tubigon, Bohol, si Sinugan naangol usab sa maong aksidente.
Sumala pa ni Sanchez padung na sa habagatan gikan sa Poblacion, Sibonga nianang tungora si Sinugan samtang ang biktima gikan pa sa Carcar City ug padung na uli sa ilaha dihang nagkabanggaay sa barangay Abugon.
Matud pa ni Sanchez nga mikawat sa lane sa trak de karga ang biktima maong nabangga kini.
“Kini siya (biktima) maoy nibangga,†matud pang Sanchez apan siya mipasabot nga bisan pa man niini kasohan gihapon si Sinugan ug ang korte na lang maoy modesisyon kung kinsay sad-an kanila.
Sumala pa ni Sanchez, subay sa nakuhang impormasyon sa traffic investigator gikan pa nagbilar sa Cebu City nianang Miyerkules sa gabii si Aldaba ug miuli og kadiyot sa ilang balay ug milahos sa Carcar City.
Nagduda ang mga imbestigador nga posibleng giduka si Aldaba nianang tungora maong wala na kini makabantay nga mikawat na kini sa pikas lane.
“Akong tambag sa mga motorista, kung gikapoy gani sila, mohunong gyud sa daplin sa karsada aron mopahuway kay aron dili madisgrasya. Kinahanglang magmatngon gyud,†pasabot pang Sanchez. (BANAT NEWS)