CEBU, Philippines - Mialibwag sa pagpanagan ang nagtapok nga grupo sa mga batan-on dihang miabot ang kapolisan apan ang usa kanila ang nadakpan didto sa barangay Lamac, lungsod sa Consolacion sa miaging alas 2:00 pasado sa kaadlawon.
Ang nadakpan mao si Marlou Waper, 28, ulitawo nga lumad nga taga barangay Mabolo sa dakbayan sa Sugbo ug gikatahapan nga supplier og shabu sa maong dapit. Si PO1 Socrates Borinaga sa kapolisan sa maong lungsod nga nahinabi sa Banat News miingon nga nagpatrolya sila si PO1 Genper Punay ug PO1 Richard Pugoy ug ilang nalabyan ang nagtapok nga batan-on sa maong dapit.
Dugang pa niya nga natingala sila si PO1 Pugoy ug PO1 Punay sa kalit nga pagdinaganay sa maong grupo maoy hinungdan nga naalarma sila ug nagdali sa pagduol sa maong dapit.
Matud pa ni PO1 Borinaga nga sa ilang pagduol ni PO1 Pugoy ilang naabtan ang suspetsado nga nagdali sa paghipos sa shabu ug sa kahimanan sa paghingos niini busa ila kining gidakop.
Si PO1 Borinaga miingon nga dihang ilang girikisa ang suspetsado nasakmit nila niini ang lima ka paketeng shabu.
Gamiton nila kini nga ebidensya sa kaso nga ilang ipasaka batok sa suspetsado.
Ang paglapas sa Republic Act 9165 kon Comprehensive of Dangerous Drug Act of 2002-maoy kasong atubangon sa nadakpan. (BANAT NEWS)