CEBU, Philippines - Patay na nga nakit-an ang usa ka lalaki nga nagbitay sa palwa sa lubi sa sitio Taloot sa barangay Valencia sa dakbayan sa Carcar sa alas 6:00 sa buntag sa miaging adlaw. Ang biktima naila nga si Eliseo Pantilgan, 38 anyos may kapuyo, molupyo sa barangay Valencia sa dakbayan sa Carcar.
Matud pa nga napalgan na lang sa igsoon sa namatay nga si Cerila Pantilgan nga nagbitay na si Eliseo sa palwa sa lubi dihang padulong unta siya nga motubag sa tawag sa kinaiyahan.
Daling miresponde ang mga polis sa Carcar Police Station sa maong alarma ug dali nilang gitabang ang biktima.
Si SPO3 Jorame Tanudtanud nga nahinabi sa Banat News miingon nga paghiabot nila sa lugar gitangtang sa mga polis si Eliseo ug gidala sa Carcar Provincial Hospital apan gideklarar na kini nga dead on arrival.
Base sa inisyal nga imbestigasyon, naglalis si Eliseo ug kapuyo niini. Sumala pa ni SPO3 Tanudtanud nga dili lang kini una nga higayon nga misulay og hikog si Eliseo. Usa ka nylon nga pisi ang gigamit niini sa iyang paghikog. (BANAT NEWS)