CEBU, Philippines - Gioktaba sa Commission on Elections ang barangay elections sa tibuok lalawigan sa Bohol tungod sa grabing kadaut sa linog niadtong adlaw nga Martes sa niaging semana.
Ang tigpamaba sa Comelec Manila nga si James Jimenes maoy nipalanog sa desisyon sa Comelec en banc nga gipagawas kagahapong adlawa.
Sigon pa ni Jimenes nga ang lalawigan sa Bohol dili na malakip sa barangay election karong Oktubre 28 ning tuiga sanglit ang mga magtutudlo ug ang mga botante na mismo dili andam sa nahisgutan nga piniliay.
Apan wala pa hinuon mahibaw-i kun kanus-a ipahigayon ang election sa barangay didto sa Bohol.
Suma pa ni Sagbayan Mayor Ricardo Suarez ug Tubigon Mayor Marlon Amella nga makatabang kanila ang pag-uswag sa piniliay sa barangay sa ilang lugar.
Kini tungod ang tibuok Bohol man ang naapektahan sa maong linog ilabina nga nagpadayon ang mga aftershocks nga nakapasamot sa kahadlok sa mga tawo.
Dako og papel ang mga barangay officials sa panahon sa katalagman tungod kay sila maoy usa sa mopamentinar sa kahapsay ug kalinaw sa ilang mga konstituwente ug sila maoy unang dangpan sa panahong susama niini.(/EIM) (BANAT NEWS)