CEBU, Philippines - Lalaki nga nakapiyansa sa kaso sa ilegal nga drugas gipusil patay sa wala pa mailhing mga lalaki nga nagsakay og motor sa atubangan mismo sa balay niini sa sitio Banakud barangay La Purisima Concepcion sa dakbayan sa Bogo kagahapon sa alas 7:00 sa buntag.
Si SPO4 Rolando Torquido sa Bogo City Police Station miila sa biktima nga si Vicente Ybañes Soronio, 30, residente sa lugar.
Matud ni SPO4 Torquido ang biktima naabot sa ilang balay kagahapon sa buntag kuyog sa iyang duha ka anak sakay sa motor apan dihang nakasulod na ang mga bata sa balay, kalit nga dunay duha ka lalaking luwan og motorsiklo nga nangabot ug diretsong namusil sa biktima.
Human niini daling misibat ang mga suspetsado padulong sa barangay Cogon sa dakbayan sa Bogo samtang ang biktima daling gidala sa Cebu Provincial Hospital sa dakbayan sa Bogo apan gideklarar kini nga dead on arrival sa attending physician nga si Dr. Almera Ancajas.
Dugang pa ni SPO4 Torquido nga nasuta sa imbestigasyon sa kapolisan nga ang biktima duha pa lang ka buwan nga nakagawas sa prisohan human kini makapyansa sa kaso niini kabahin sa ilegal nga drugas.
Ang biktima usa na ka tuig nga nabalhog sa prisohan sa kasong kalapasan sa Sec. 11 Art 11 sa Republic Act 9165 una pa kini nakapiyansa. (/EIM) (BANAT NEWS)