CEBU, Philippines - Patay ang duha ka mga bata human kini nangahagbong ug nangalumos sa tabay niadtong Lunes sa buntag diha sa sitio Sawsawan, barangay San Roque, dakbayan sa Talisay.
Ang maong insidente naatol sa bisperas sa pista sa Talisay.
Ang mga biktima mao ang manag-agaw nga Princes Natalie Sanchez ug John Milfred Abillo nagpanuigon og 5 ug 4-anyos kinsa pulos patay na dihang nadangat ngadto sa Talisay City District Hospital.
Si SPO1 Mikie Espina, PO1 Stephen Sefuesca ug PO1 Edwin Campomanes ang miresponde sa nahisgutang alarma.
Si Sefuesca nga nahinabi sa Banat News mibutyag nga ang duha ka mga bata nanuroy kini mga alas 8:00 sa buntag.
Matud ni Sefuesca nga dunay laing mga bata ang nakakita sa mga biktima nga giingong naglatay-latay diha sa paril sa tabay unya nagtinukmuray.
Ang maong tabay dunay unom ka tiil ang giladmon wala kini takub ug niadtong higayona hamabaw ang tubig niini.
Ang mga bata nabantayan kini sa mga silingan nga nalumos na mga alas 11:00 sa buntag diin usa sa biktima giingong mibutod na kini ug milutaw samtang ang usa ka bata naglundang pa kini diha ilawom sa tabay.
Dugang ni Sefuesca nga niadtong higayona walay mga dagku nga nakabantay ug nakabadlong sa mga bata nga naglatay-latay sa paril sa tabay. (BANAT NEWS)