CEBU, Philippines - Gipatawag sa buhatan ni Customs Commissioner Rufino Biazon ang duha ka mga kontrobersiyal nga customs police sa Bureau of Customs Cebu nga gipasanginlan sa kahugpungan sa mga custom brokers sa Cebu nga nag-abusar sa ilang trabaho ug mangayo og “padangog.â€
Ang presidente sa Cebu Customs Personeros Association kon CCUPA nga si Ulysses Cena kinsa mao usab ang unang nipirma sa reklamong harassment ug pag-abuso sa katungdanan batok nila ni Special Agent 1 Niño Empacis ug ni Special Agent Alfredo Regidor gikatahong nakadawat og komunikasyon gikan sa buhatan ni Biazon.
Base sa report, si Cena giingong nakadawat og komunikasyon gikan ni Biazon nga nagpahibawo nga sila si Empacis ug Regidor didto na gipa-report sa kaulohan.
Kini aron patubagon sa alegasyon sa pagpangabuso ug pagpangilkil nga gipasangil kanila sa mga customs brokers sa matag pagpagawas nila og container vans sa Cebu International Port kon CIP.
Sumala pa nga si Cena giingong gipatawag usab ngadto sa buhatan ni Biazon aron sila paatubangon sa duha ka customs police.
Ang maong opisyal matud pa nga dako og pagsalig sa tinud-anay nga repormang gusto nga buhaton sa BOC kontra kurapsyon sanglit nihimo dayon si Biazon og aksyon sa ilang giduso nga reklamo ngadto sa Bureau of Customs sa kaulohan ug copy furnish ang buhatan sa Ombudsman. (/EIM) (BANAT NEWS)