CEBU, Philippines - Mikunhod ang gidaghanon sa kaso sa dengue sa dakbayan sa Talisay ning tuiga kun itandi sa milabay’ng tuig matud ni Talisay City Health Officer, Dr. Lino Alazando.
Matud ni Alazando nga gikan sa buwan sa Enero hangtud sa Hulyo niining tuiga ang siyudad mitala lang og 133 nga kaso sa dengue nga naggikan sa edad nga 16-anyos pataas ug wala say nakalas.
Kahinumduman nga base sa talaan sa Regional Epidemiology and Surveillance Unit (RESU) sa Department of Health (DOH)-7 sa unang semana sa buwan sa Hulyo sa milabay’ng tuig mikabat ngadto sa 168 ang kaso sa dengue sa dakbayan sa Talisay hinuon wala’y natalang namatay.
Ang dakbayan sa Talisay maoy ika-lima sa kinadaghanan og kaso sa dengue sa milabay’ng tuig sa tibuok rehiyon. Si Alanzado nagkanayon kini nga ang higpit nga pagpahigayon sa ilang trabaho sa dengue task force sa kampaniya batok sa dengue maoy hinungdan sa pagkunhod sa kaso niini sa Talisay. Ang task force mosuroy kini sa kabarangayan sa siyudad diin sila mismo ang mangita sa mga lugar nga posibleng puy-an o itloganan sa mga lamok ug butangan nila kini og larvicide o kemikal nga mopatay niini.
Gawas niini ang kagamhanan sa siyudad padayon sa ilang pagpahimangno sa katawhan nga kanunay’ng manglimpiyo sa ilang palibot aron malikayan ang dengue.(/EIM) (BANAT NEWS)