CEBU, Philippines - Human gisaway tungod kay walay mga alamag sa Traffic Laws ug Traffic Management, gikatakdang bansayon ang mga traffic enforcers sa dakbayan sa Talisay sa mosunod nga mga adlaw. Kahinumduman nga mga traffic enforcers sa siyudad gisaway sa mga motorista ug pedestrians tungod kay giingong walay alamag kabahin sa balaod sa trapiko.
Si Cedentario Labajo, supervisor sa mga traffic enforcers sa Talisay miangkon nga wala pa mapaubos og seminar ang mga enforcers sa Talisay.
Duna na hinuon silay letter request ngadto sa Land Transportation Office (LTO) nga mapaubos sa seminar ang mga traffic enforcers kabahin sa traffic management ug basic traffic rules and regulation.
Si Bise Mayor Romeo Villarante, chairman sa City of Talisay-Traffic Operation Development Authority (CT-TODA) mibutyag sa Banat Manobela nga posibleng sa sunod semana ipaubos na sa seminar sa LTO ang mga traffic enforcers.
Gibutyag ni Villarante nga problema sa mga bag-ong traffic enforcers sa siyudad mao ang pag- ilis-ilis kanila tungod kay pipila lang ka buwan ang ilang mga kontrata. Duna pa hinuoy mga karaang traffic enforcers nga duna gyuy kahibalo sa Traffic Laws ug Traffic Management apan ang mga bag-o maoy wala pa maka-seminar. Adunay 130 ka traffic enforcers sa siyudad. (BANAT NEWS)