CEBU, Philippines - Naangol ang usa ka bayong-bayong nga naigo sa saag nga bala samtang mitambong sa kalingawan sa kasaulogan sa pista didto sa dalan M.L. Quezon sa barangay Pusok, dakbayan sa Lapulapu alas 12:00 pasado ang takna sa miaging gabii.
Ang biktima mao si Diano Virallo Mandaue, 17, ulitawo nga taga dalan M. Dimataga sa barangay Poblacion sa maong dakbayan. Si PO1 Emmanuel Dariada sa kapolisan sa Presinto 5 sa Lapulapu City Police Office nga nagbase sa barangay Pusok mibutyag sa Banat News nga kuyog sa biktima ang duha niini ka higalang babaye .
Samtang nalingaw kini nga nagtan-aw sa mga pasundayag kalit lang mitumaw ang wala hiilhing lalaki nga mipusil sa gituohang kontra niini nga didto duol sa biktima
Dugang pa ni PO1 Dariada nga gumikan tingale sa kakurog sa kamot sa kriminal wala maigo ang gipuntariya niyang kontra.
Apan pipila ka gutlo ang nakalabay namatikdan sa biktima nga namanhod ang iyang bitiis ug miagas ang dugo kay naigo diay sa bala.
Si PO1 Dariada miingon nga dali nga gihatod ang biktima ngadto sa Lapulapu City District Hospital ug gibalhin kini ngadto sa Vicente Sotto Memorial Medical Center sa dakbayan sa Sugbo.
Matud pa ni PO1 Dariada nga daghang tawo unta nga nakakita sa kriminal kinsa mikabad usab og dagan, apan walay nakaila niini.
Samtang ang tawo nga maoy puntariya sa maong pagpamusil wala usab nila hiilhi kay wala man usab kini mopatim-aw sa buhatan sa kapolisan. (/WC) (BANAT NEWS)