CEBU, Philippines - Patay ang usa ka giingong sakop sa Alpha Kappa Rho fraternity nga mitambong sa haya sa iyang apohan dihang kini gipaulanan og bala sa duha ka wala mailhing mga lalaking nag-motor diha sa sitio San Roque sa barangay Lamac sa lungsod sa Consolacion kagahapon sa kaadlawon.
Samad pinusilan sa liog ug suwang ang nakaingon sa kamatayon sa biktimang si Orland Iriarte Evangelista, 26, drayber og habalhabal ug residente sa barangay Mabolo, Cebu City.
Padayon pang gipangita sa kapolisan ang duha ka mamumuno nga giingong nagsuot og bonnet ug nagsakay og itom nga ‘skeleton’ nga motorsiklo nga wala’y plaka kinsa daling mibiya sa lugar human sa pagpamusil.
Sumala pa sa sport report nga nakuha sa Banat News gikan sa Consolacion Police Station, ang biktima naglingkod diha sa iyang motorsiklo atubangan sa kapilya diin gihaya ang iyang apohan ug nakigtabi sa higalang si Marvin Casas dihang nahitabo ang pagpamusil.
Matud pa nga kaupat ka higayon gipusil ang biktima gamit ang usa ka kalibre .45 pistola base usab sa nakuhang mga basiyo diha sa crime scene. Wala pay nakuhang lead ang kapolisan sa motibo sa maong krimen. (BANATNEWS)