CEBU, Philippines - Tulo ka mga suspects sa gang rape ang nasikop sa kapulisan sa gipahigayon nga operasyon sa miaging adlaw sa bukirang bahin sa barangay Managase sa lungsod sa Borbon ug Barangay Damolog sa lungsod sa Sogod.
Ang mga suspek apil na ang laing usa nga karon gawasnon pa gipasanginlang milugos sa usa ka 50- anyos nga babaye adtong Marso ning tuiga.
Ang kapulisan pinanguluhan ni Borbon police chief, Insp. Glen Devocion, unang misikop kang Benjie Nasoli ug sa ig-agaw niini nga si Lito “Titing†Pastida, mga alas 10:30 sa gabii sa Barangay Managase.
Ang pagkasikop sa duha miresulta sa pagkasikop usab sa igsuon ni Benjie nga si Eddie Nasoli sa Barangay Damolog mga alas 11:00 sa gabii.
Armado ang kapulisan og warrant of arrest sa kasong rape nga giluwatan ni Regional Trial Court Judge Antonio Marigomen, Branch 61, Bogo City sa dihang gisikop nila ang mga suspek sa ilang mga panimalay. Si Devocion misuway unta sa pag-ikyas apan napakyas kini. Ang mga suspek giingong milugos sa biktima dihang paingon na unta silang mopauli gikan nag-inom. Apan ang biktima sa sunod adlaw na nakapa-blotter. (BANATNEWS)