CEBU, Philippines - Hayan mag-atubang og kaso ang babaye sa usa ka viral video sa facebook matud pa sa Department of Social Welfare and Development 7 sa report sa TV Patrol Central Visayas kagahapon.
Makita sa maong video nga naghilak ang usa ka 5-6 anyos nga bata samtang gisulod kini sa usa ka baril nga may sulod nga tubig ug gilatos og bunal sa babayeng gituohang iyahang inahan gamit ang tualya.
Wala pa matagbaw ang maong babaye, gibuboan niini og tubig ang bata sa makaduha ka higayon ug iya kining gipusposan sa kabo nga iyang gigamit.
Madungog nga Bisaya ang sinultihan sa maong babaye nga mibahad sa bata nga kun dili kini mohunong og hilak patyon niya kini. Gibaha og komento ang maong video sa Facebook ug sagad sa mga nikomento naglagot ug wala gyud kauyon sa gibuhat sa maong babaye.
Matud pa sa report ni Reno Tallada sa TV Patrol Central Visayas kagahapon sa hapon nakugang ang DSWD 7 sa maong video ug matod pa sa inisyal nga imbestigasyon niini nga Region 6 gikan ang maong video. Apan wala niini gisalikway nga posibleng naa ra sa Region 7 ang lugar sa maong video sanglit binisaya man ang sinultihan sa babaye nga makita sa video.
Sa maong report si Grace Yana, ang espesyalista sa Child and Youth Welfare Program sa DSWD 7 nakaingon nga nagkagrabe ang kadaotan sa kalibotan ug sa mga tawo.
Nanawagan si Grace Yana sa DSWD 7 sa mga tawo nga nakaila sa maong babaye sa pag-report sa DSWD aron mapasakaan kini og kasong child abuse ug hayan mapriso kini sa pagmaltrato niya sa bata. (BANAT NEWS)