CEBU, Philippines - Ang mga investors nga gustong motukod og proyekto dinhi sa Sugbo gitanyagan ni Mayor Michael Rama sa pagtukod og Super Multi-Purpose building nga magamit sa commercial ug dinagko nga sports activities. Matud ni Rama nga ang maong higante nga multi-purpose building anha niya ipatukod sa South Road Properties (SRP) ug iyang gitahasan si SRP Manager Roberto “Bo†Varquez nga maoy moasikaso sa iyang plano.
Ang hukom ni Rama nga angay’ng dunay pagatukoron nga Super Multi-Purpose building anha sa SRP naggumikan kay ang Cebu Coliseum nga kaniadto maoy labing dako nga gym dinhi sa dakbayan kanunay na nga mapuno kun adunay dagku nga kalihukan.
Nasaksihan mismo ni Rama nga dihang nagsangka ang mga basketball players sa Southwestern University ug University of the Visayas dili pa lang dugay, hilabihan ka puno sa tawo ang Cebu Coliseum. Ang gipangandoy niya nga Super Multi-Purpose building nga tukoron sa SRP dili ang dakbayan maoy mogasto niini kundili ang mga investors pinaagi sa gitawag og Build-Operate-Transfer (BOT) scheme. Usa kini ka paagi diin ang proyekto gastohan sa investor ug sila maoy mo-operate sa facility sulod sa termino nga masabutan aron mabawi ang ilang gasto ug panag-iyahon human niini i-transfer nila ang pagpanag-iya niini sa kagamhanan sa dakbayan ini’g human sa termino. (BANAT NEWS)