CEBU, Philippines - Ang paghapsay sa kadalanan sa dakbayan sa Mandaue gitinguha sa buhatan sa Traffic Enfocement Agency of Mandaue (TEAM) busa higpit nga gidili ang pagpataka og parking sa mga sakyanan sa mga sidewalk.
Si Edwin Ermac, executive officer sa TEAM mibutyag sa Banat News nga daghan na kaayo ang mireklamo batok sa illegal parking sa mga kadalanan sa dakbayan.
Ang mga manindahay sa merkado publiko sa barangay Centro, nagkanayon nga wala nay mamalit sa ilang mga baligya kay dakpon man sa kapolisan ang mga sakyanan sa ilang mga kustomer. Ang pagdakop sa maong sakayanan maoy himoon sa traffic enforcer pinaagi sa pagluwat og citation ticket niini.
Ang madakpan maoy modala niining tiket ngadto sa buhatan sa tresurero sa dakbayan ug mobayad og P200 nga multa sa maong kalapasan.
Si Ermac sa iyang pagpasabot miingon nga higpit nilang gidili ang pag-parking sa mga dalan nga naglibot sa merkado publiko sa tuyo nga dili maalihan ang mga sakyanan nga moagi niini.
Dugang pa niya nga aron kalikayan nga madakpan kinahanglang adto sila moparking sa ibabaw nga bahin sa merkado publiko kay mao man kini ang giandam nga parkinganan.
Gitataw ni Ermac nga sa kasamtangan mo-isyu sila og citation ticket ngadto sa mga drayber nga madakpan tungod kay wala pa sila’y impounding area nga kapundohan sa ilang mga madakpan nga sakyanan. Midugang si Ermac nga padayon pa sila karon sa pagpangita og lugar alang sa kabutangan sa mga sakyanan nga ilang madakpan. (BANAT NEWS)