CEBU, Philippines - Mikabat sa P600 mil ang nasakiyo sa wala pa hiilhing tawo nga milungkab sa usa ka opisina nga nahimutang sa 481 Archbishop Reyes Avenue sa barangay Lahug, sa dakbayan sa Sugbo sa miaging buntag.
Base sa blotter sa Theft and Robbery Section, nasayran nga ang gilungkab mao ang Poobsan Office nga gipanag-iya ni Gladys Uy.
Matud pa nadiskobrihan ni Mabu Requina, 37 , usa ka caretaker nga gilungkab ang maong opisina sa alas 9:30 sa buntag sa miaging adlaw.
Mirespondi ang hepe sa TRS nga si Insp. William Alicana sa maong opisina ug atol sa ocular inspection nga gipahigayon niini uban ang hepe sa Criminal Investigation Branch nga si Chief Insp. Romeo Santander, nasuta nga gituyo pagguba ang grill sa bintana sa maong opisina.
Kini pinaagi sa pagligwat niini ug gitangtang ang jalousie dayong sulod sa kawatan sa opisina.
Nakuha ang mikabat sa P600 mil nga salapi nga didto sulod sa safety box, duha ka stub sa tseke, usa ka passbook sa usa ka restaurant.
Padayon karon ang imbistigasyon sa kapolisan sa pag-ila sa kawatan. (BANAT NEWS)