CEBU, Philippines - Tungod sa pagpahigayun og Santos nga Misa sa niaging kasaulogan sa ika-444 nga founding anniversary sa lalawigan sa Sugbo sa Agosto 6, 2013, hayan mag-atubang og kiha si Gov. Hilario Davide III. Kini ang bahad sa beteranong magsisibya sa radio, Mike Aton, kinsa nangangkon nga siya maoy Dean of Cebu Media Commentators ngadto kang Davide.
Si Aton, deputy anchor sa senemanang Media Forum on the Air sa DYRB, mipasangil nga nakalapas si Davide sa Batakang Balaud labi na ang Section 29 (2) sa 1987 Constitution.
Ang balaud nag-ingon nga dili mahimong gamiton ang pundo sa gobyerno sa paggasto ug pagsuporta sa kalihukan sa simbahan gawas lang kung ang pari o ministro anaa mag-alagad sa armadong kusog ug ubang institusyon sama sa bilanggoan ug tambalanan.
Matud pa ni Aton nga ang gipahigayong misa sa usa ka paring Katoliko sa maong okasyon tataw nga nakalapas sa maong lagda sa balaud.
Gani himoon mismong saksi ni Aton si Davide sa maong kalapasan sanglit ang gobernador mismo usa sa nitambong sa maong misa.
Si Aton dili motoo nga ang maong tradisyon lisensiyado nga mahimo na lang ibalewala ang lagda sa balaud.
Iyang gisugyot nga angayan na nga hunungon ang maong tradisyon ug ang gobernador ang angayang mopasiugda sa paghunong niini.
Tun-an pa ni Davide kung angayan bang tubagon ang bahad ni Aton nga mopasaka kini og kihang kriminal sa buhatan sa Ombudsman. (BANAT NEWS)