CEBU, Philippines - Miabot na og lima ka tawo ang naghikog karong semanaha dinhi sa Sugbu gikan sa managlahing dapit.
Kagahapon sa buntag, usa ka inmate sa Cebu Provincial Detention and Rehabilitation Center diha sa barangay Kalunasan ang nahimong ikalimang tawo nga nagkutlo sa ilang kaugalingong kinabuhi nga giila nga si Jupiter Sasing.
Si Sasing napalgang wala nay kinabuhi ug nagbitay na sa sud sa iyang selda alas-onse sa buntag kagahapon.
Matud pa ni Jail Warden Romeo Manansala sa pakighinabi sa Banat News nadiskobrihan sa kauban sa selda ni Sasing nga nagbitay na ug gigamit ang sako sa bugas nga gihimo niining pisi.
Si Manansala nagkanayon nga gipatawag unta pinaagi sa public address system si Sasing tungod kay mibisita kaniya ang iyang asawa apan wala kini mogawas hinungdan nga nahibulong ang asawa ug gipaapas ngadto sa kauban niini diha sa selda.
Human madiskubrehi gidala sa Vicente Sotto Memorial Medical Center si Sasing apan gideklarar kini nga dead on arrival.
Matud pa ni Manansala nga nagdumili na ang pamilya ni Sasing sa pagpa-awtopsiya sa lawas niini tungod kay nadawat na nila ang gidangatan niini. Samtang padayon pa usab ang imbestigasyon kung unsay hinungdan sa iyang paghikog.
Samtang patay na usab nga napalgan si Alberto Mantalaba, 80, lumolupyo sa sitio Nabuntoran, barangay Kawasan sa lungsod sa Aloguinsan.
Matud ni PO2 Recelieto Kilaton sa Aloguinsan Police Station nga nangluod ang biktima kay wala mosugot ang asawa niini nga mosuroy siya sa disko nga naa duol sa ilaha.
“Basin nangluod to siya sir tungod sa katiguwangon,†matod pa ni Kilaton.
Pipila ka minuto ang milabay ang anak sa biktima nga si Avelina Jimenez nangita sa iyang amahan sa kalibonan ug iya na lang nakit-an nga nagbitay na kini sa punoan sa tambis. Midugang si Kilaton nga naandan na ni Mantalaba nga mogawas sa ilang balay sa matag higayon nga mag-away sila sa iyang asawa.
Niadtong adlaw nga Domingo, usa ka dalagitang giila nga si Arjeane Ugahayon Rubio, 16- anyos ang naghikog 3rd year high school, lumolupyo sa barangay Bato sa dakbayan sa Toledo.
Nakit-an na lang ni Arjoy Rubio, maguwang sa dalagita ang iyang manghod nga nagbitay na sa iyang kwarto gamit ang kurtina nga gihikot sa iyang liog. Duha ka adlaw na ang milabay, usa ka Mark Kenneth Marquez, 20, usab ang naghikog diha sa Don Andres Soriano sa Toledo City. Niadtong adlaw nga Biyernes usab naghikog ang usa ka Antonio Jenefer Nonong Himalarin, 58, nga taga Talamban, Cebu City.
Wala pay hiniusang eksplinasyon ang kapolisan kung nganong dunay mga panahon nga may magsunod nga mga kaso sa paghikog.
Samtang kagahapon, kritikal ang kahimtang sa usa ka 47-anyos nga babaye nga giingong misuway paghikog pinaagi sa paglayat sa Marcelo Fernan Bridge niadtong Sabado sa hapon. Ang maong babaye (pangalan gipugngan sa Banat News) taga Brgy. Lamac lungsod sa Pinamungahan.
Sa pasiunang imbestigasyon ni PO1 Rio Rios, sakop sa Special Reaction team sa PNP Maritime Police Command nakadawat sila og tawag nga dunay babayeng milayat sa maong taytayan alas-dose pasado sa udto.
Dali silang miresponde sa maong dapit ug ilang nakita ang usa ka ginang nga luya kaayo apan naglutaw sa dagat maong dali nila kining gihaw-as sa dagat ug gidala sa tambalanan. Usa ka identification card ang ilang nakuha maong nailhan nila dayon kini. Gumikan sa kagrabe sa kahimtang niini gidala kini sa Vicente Sotto Memorial Medical Center alang sa dugang pag-atiman. (BANAT NEWS)