CEBU, Philippines - Usa ka wala milhing lalaki ang mitulis sa cashier sa usa ka tindahan sa sitio Awayan, Poblacion III sa dakbayan sa Carcar sa alas 9:15 sa buntag sa miaging adlaw.
Ang kahera mao si Tito Dumanjug, 38, nagpuyo sa Poblacion I sa dakbayan sa Carcar, cashier sa JM Poultry and Livestock Supply. Base sa spot report sa Cebu Provincial Police Office nga ang biktima mitawag sa buhatan sa Carcar Police Office aron sa pagtaho nga gitulis siya sulod sa tindahan nga iyang gitrabahoan.
Ang hepe sa Carcar nga si Inspector Villarin misusi sa dapit ug nasuta sa imbestigasyon nga ang biktima nag-ihap sa halin sa maong tindahan dihang may usa ka lalaki ang misulod ug mition og .38 nga revolver kaniya dayong deklarar og tulis.
Matud pa gimandoan sa tulisan ang biktima nga isulod sa dala niining knapsack ang halin nga P10 mil.
Ang suspetsado nagsul-ob og itom nga purol ug itom nga jacket ug nagsul-ob kini og helmet ug daling migawas ug misakay sa usa ka motor nga dunay nagpaabot nga kaubang lalaki.
Sumala pa nga sa wala pa makabiya ang maong tulisan usa sa mga trabahante ang giingong mibunal og kahoy sa liog sa tulisan apan daw wala ra kini matarog tungod kay nagsuot man og helmet ug daling misutoy og padagan.
Mao na kini ang ikaduhang pagpanulis nga nahitabo sa siyudad sa Carcar sud sa duha ka semana,diin ang una mokabat sa P1.2 milyones ang nakuha gikan sa kolektor sa bangko nga nangolekta sa usa ka poultry farm. (BANAT NEWS)