CEBU, Philippines - Baynte-uno ka barangay sa siyudad sa Mandaue nakahatag na sa ilang cash donations ngadto sa buhatan sa Commission on Election (COMELEC) isip ilang kontribusyon sa galastohan sa nahisgotang buhatan sa Oktubre 28, 2013 barangay election.
Si Mandaue City Association of Barangay Council (ABC) Federation President ug Subangdaku Barangay Kapitan Ernie Manatad nga nahinabi sa Banat News mitug-an nga mosunod ra ang unom ka mga barangay nga nalangay.
Sumala pa niya ang barangay Opao, Umapad, Centro, Jagobiao ug barangay Tabok padayon pang nagproseso sa ilang mga dokumento aron makapagawas og pundo alang niini.
Si Kapitan Manatad nagkanayon nga mihangyo ang unom ka barangay kang Mandaue City Election Officer Atty. Ann Fleur Gujilde nga lugwayan sila aron mahatag ang kontribusyon nga tag P10,000 kada barangay.
Mao kini ang kuhaan sa COMELEC alang sa honorarium sa mga magtutudlo nga magsilbing Board of Election Inspector sa umaabot nga piniliay sa barangay.
Samtang duha lang sa 22 ka mga barangay sa Talisay ang nakahatag sa ilang kontribusyon.
Si Talisay City assistant Comelec officer Anna-Lou Bacho mibutyag nga ang barangay San Isidro ug Lawaan III pa maoy nakatunol sa kontribusyon samtang ang uban magpahigayon pa og sesyon una pa sila makahatag niini.
Karong Oktubre 18 ang kataposang adlaw sa paghatag sa mga barangay sa ilang kontribusyon. Ang filing sa Certificate of Candidacy (COC) magsugod karong Oktubre 11, 2013 hangtud sa Oktubre 17, 2013.
Ang pagpangampaniya magsugod sa Oktubre 18, 2013 hangtud kini sa Oktubre 27, 2013. (BANAT NEWS)