CEBU, Philippines - Wala manginlabot si Mayor Paz Radaza sa dakbayan sa Lapulapu kalabot sa gitrabaho nga karsada sa circumferential road sa Lapulapu nga gipakontrata sa Department of Public Works and Highways (DPWH).
"Wala koy labot anang proyektoha iya man na sa DPWH 7", sumala ni Radaza kinsa mipamatuod nga proyekto kini nga gigastoan sa nasudnong kagamhanan.
Miingon si Radaza nga dili sila makaimpluwensya sa DPWH kung wala mabayri niini si Mary Ann Gonzalodo ang tag-iya sa Gonzalodo Enterprises nga kontraktor sa maong proyekto.
Gipasabot ni Mayor Radaza nga wala siya mahimuot sa pag-implementar sa maong proyekto gumikan sa walay igong koordinasyon sa DPWH ngadto sa siyudad atol sa pagsugod sa maong proyekto.
Gani matud pa sa mayor nga nakahatag kini og kahasol sa mga motorista ug ingon man sa tagdumala sa Plantation Bay nga si Efren Belarmino ang General Manager.
Hinuon gipadangat na ni Mayor Radaza ang maong reklamo ngadto ni DPWH 7 Regional Director Engr. Pedro Herrera Jr. ug Engr. Santiago Suico ang OIC District Engineer niadtong Feb. 20, 2012.
Si Engr. Suico mipadayag nga nagbuotbuot ang maong kontraktor (Gonzalodo) sa pagsugod sa maong proyekto bisan pa nga walay Special Allotment Release Order o SARO.
Gumikan niini nasuko si Mayor Radaza kay giguba ang dalan sa Brgy. Marigondon apan wala tiwasa sa kontraktor ang maong proyekto niadtong Pebrero tuig 2012. Matud pa ni Radaza wala sila’y obligasyon sa maong kontraktor kundi ang buhatan sa DPWH ang manubag niini ug dili ang siyudad.(/WC)(BANAT NEWS)