CEBU, Philippines - Ang hepe sa kapolisan sa dakbayan sa Carcar mibutyag nga mga local boys ang mga tulisan nga mitulis sa messenger sa usa ka bangko sa siyudad diin nadala ang P1.2 milyon nga kwarta niadtong Huwebes. Si Chief Inspector Delelis, hepe sa Carcar City Police Station wala una mobutyag sa mga pangalan sa duha ka mga suspetsado kinsa giingong maoy mitulis kang Marvin Cababan, 36-anyos, samtang nagpahigayon pa ang ilang follow-up operation.
Matud ni Delelis nga ang duha nalambigit na kini kaniadto og mga pagpanulis.
Sa imbestigasyon sa kapolisan nga si Cababan nagdala kini sa nahisgutang kwarta gikan sa VIFCO piggery farm paingon ngadto sa bangko dihang gitulis kini sa duha ka mga lalaking nagsakay og motorsiklo nga parehong nagsul-ob og helmet niadtong Huwebes sa alas 11:00 sa buntag diha sa barangay Valladolid. Si Delelis nagkanayon kini nga wala nila isalikway ang anggulong inside job diin posibleng ang mga tulisan duna kini kakonsabo nga nakahibawo nga si Cababan magdala sa nahisgutang kantidad sa kwarta niadtong adlawa.
Matud usab ni Delelis nga dunay third party ang nalambigit sa maong tulis diin ilaha kining gipangita karon tungod kay mao kini makatudlo nila aron masikop ang mga tulisan. (BANAT NEWS)