CEBU, Philippines - Si Talisay City Administrator John Yre De los Reyes namalibad nga dili tanang nag-apilyedo og De los Reyes ilaha kining mga paryente.
Kini kabahin sa isyu sa mga job order diha sa city hall nga giingong ubay-ubay nga paryente sa mayor ang gipasiguro og pasulod og trabaho.
Sa listahan sa confidential assistant sa mayor nasuta nga dunay tulo ka mga nag-apilyedo og De los Reyes ug dunay lain pang mga paryente nila ang giingong naa karon nagtrabaho sa nagkalain-laing buhatan sa city hall.
Gawas niini gikataho nga giingong dunay mga anak ang mayor nga atoa sa Amerika ang dunay mga punch card sa city hall. Si Yre nga nahinabi sa mga tigbalita nagkanayon nga dili tanang nag-apilyedo og De los Reyes ilahang paryente nahitabo lang nga nakapareha nila kini og apilyedo apan dili nila kini kaila. Gihimakak usab ni Yre ang report nga dunay mga punch cards sa city hall ang iyang mga igsuon nga atoa sa Amerika.
“Dili na na tinuod, grabe na na….panaot lang na,†ni Yre pa. Gipaambit ni Yre nga duna siya’y nadawat nga report nga gipasanginlan usab silang nakapatukod og balay nga nagkantidad og P5 milyones nga bag-o pa silang nakalingkod karon sa administrasyon. Hinuon giangkon ni Yre nga duna silay pito ka mga paryente nga gipatrabaho diha sa city hall.
Gipasabot ni Yre ang administrasyon karon dunay katungod nga maka-hire og kawani nga ilang masaligan.
Matud ni Yre nga duna sila’y gitaktak nga paryente tungod kay miabuso kini sa ilang trabaho. Dugang niya nga mikabat karon sa 1,800 ang job order sa city hall. (/EIM) (BANAT NEWS)