CEBU, Philippines - Kritikal ang kondisyon sa usa ka batan-on human kini dunggaba sa iyang mga higala didto sa Brgy. Poblacion dakbayan sa Lapulapu kagahapon sa kaadlawon.
Ang biktima mao si Junrey Abenuja, 19, ulitawo, residente sa Sitio Iba, Brgy. Basak dakbayan sa Lapulapu.
Sa pasiunang imbestigasyon sa kapolisan nasuta nga nianang miaging gabii pa nga nag-inom si Abenuja uban sa iyang mga higala ug kagahapon sa mga alas 4:00 sa kaadlawon napalgan na lang kini nga nagkadugo ug adunay tulo ka samad dinunggaban sa iyang apapangig, bukton ug tiyan.
Gidali kini sa pagdala ngadto sa tambalanan diin ubos sa kritikal nga kondisyon gumikan sa kadaghan sa dugo nga miagas.
Nagduda ang mga residente sa maong dapit nga giunay kini sa iyang mga kainom kinsa wala na igkita sa kapolisan didto sa maong dapit.
Susihon usab sa kapolisan ang motibo sa maong krimen ug pag-ila sa responsable niini. (BANAT NEWS)