CEBU, Philippines - Nakugang ang usa ka janitor nga babaye human mabangali niini ang batang bag-ong natawo o puya sulod sa usa ka mall sa Brgy. Bakilid dakbayan sa Mandaue sa milabay’ng hapon.
Sa imbestigasyon ni PO1 Cristito Raboy sa kapolisan sa Station 1 sa Mandaue City Police Office (MCPO) nasayran nga mga alas 4:00 sa milabay’ng hapon ang janitor nga babaye nangolekta og basura sulod sa J. Center mall.
Wala ibutyag ang ngalan sa maong janitor kinsa nagkanayon nga usa ka putos nga nagkadugo iyang nakita.
Dihang iyang gisusi, nasuta nga usa diay ka puya nga bag-ong natawo.
Gitaho dayon sa maong janitor ang iyang nakita ngadto sa ilang security personnel kinsa mao usab ang mitawag sa kapolisan.
Sa pagresponde ni PO1 Raboy dili pa maila ang maong puya kung lalaki o babae ug bag-o pa kining gilabay sa inahan sud sa maong mall.
Susihon sa kapolisan ang CCTV sa maong mall aron maila ang responsableng inahan nga milabay sa iyang anak sa basurahan aron mapasakaan og kaso.
Samtang gidala ang puya sa usa ka lokal nga punerarya aron ikalubong dayon kini sa sam-ang sa dakbayan sa Mandaue. (BANAT NEWS)