CEBU, Philippines - Ang buhatan sa Department of Environment and Natural Resources (DENR) 7 hingpit nga nakapagawas og kapin sa P1 milyon nga salapi ngadto sa pito ka People’s Organization (POs) sa lungsod sa Cordova ug dakbayan sa Lapulapu isip suhol sa pagpanglimpiyo nila sa mangrove plantation sa maong dapit nga natina sa asayte ug krudo gikan sa nalunod nga M\V St. Thomas Aquinas.
Si Dr. Isabelo R. Montejo nga maoy regional executive director sa DENR 7 miingon nga ilang gihimo ang pang-apod-apod sa mga tseke ngadto sa naapektohan nga mga molupyo nga sakop usab sa pito ka kapunongan sa lungsod sa Cordova ug dakbayan sa Lapulapu.
Ang pito ka mga POs nga nakadawat og tseke mao ang Nagkahiusang Mananagat sa Bang-Bang nga ang tseke nagkantidad og P424, 320; Pilipog Fisheries Association nga tseke nagkantidad og P87,715, Alegria Fisherfolks Association, P66, 300; Singgit sa Mananagat sa Barangay San Miguel nga P106,080; Panaghugpong sa Day-asanong Mananagat, P53,300; Gilutongan Water Distributor and Resource Management Multi-purpose Cooperative, P66.300 ug Nagkahiusang Mananagat sa Calawisan nga nagkantidad usab ang tseke nga ilang nadawat og P265,200.
Ang pagpagawas sa DENR 7 sa maong kantidad ngadto sa kahugpongan sa nga mananagat maoy nagsilbing hinabang nila ngadto sa mga molupyo kansang panginabuhi sa panagat nabaraw gumikan sa pagkaylap sa oil spill sa maong lugar.
Gani mismo ang mga kapitan sa barangay sa maong lungsod mipirma og affidavit sa barangay sa pagpamatuod sa nasinating kadaut sa ilang mga bakhawan gumikan sa oil spill sa ilang kadagatan.
Kini mao ang barangay Bangbang, Buagsong, Day-as, Catarman, Poblacion, Alegria, Gabi, Pilipog ug San Miguel, Calawisan, Babag ug Suba Basbas sa dakbayan sa Lapulapu. (BANAT NEWS)