CEBU, Philippines - Sugod karong adlawa Martes, Septembre 24, 2013 hingpit nang hulipan sila si Cebu District Collector Edward dela Cuesta ug si Customs Intelligence Service chief Atty. Francis Rey "Koko" Holganza sa ilang tagsatagsa ka katungdanan.
Si dela Cuesta hulipan ni Manila Container International Port ( MCIP) district Collector Ricardo Belmonte nga mao usab ang kanhi district collector sa Cebu nga gisundan ni dela Cuesta.
Samtang si Atty. Holganza nga nagdumala sa iyang posisyon sa pagka-hepe sa Intelligence Service sa Cebu Customs Office sulod na sa napulo ka tuig hulipan usab ni Arneth Von Manquiquiz.
Ang maong pagrelibo sa nahisgutang mga opisyal ug kawani sa Bureau of Customs sa Cebu sangputanan sa mando sa Department of Finance nga pabalikon sa ilang orihinal nga plantilla nga position ang tanang opisyal ug kawani sa Bureau of Custom.
Nasayran nga si Holganza usa sa mga nakasikop niadtong 1,169 ka sinakong bugas humay nga gipalusot dinhi sa Sugbo gikan sa nasud sa Vietnam.
Karong adlawa gikataho nga moasumer na usab si Belmonte sa iyang katungdanan dinhi sa Sugbo.
Si Dela Cuesta adto na idistino sa Ninoy Aquino International Airport (NAIA) hulip kang Ding So nga mohulip usab ni Belmonte. (BANAT NEWS)