CEBU, Philippines - Mokabat sa 70 kapin ka posisyon ang apektado sa gihimong lahugay sa Bureau of Customs (BOC) sa Port of Cebu.
Base sa nakuhang impormasyon sa Banat News ang 70 kapin sa mga empleyado sa Customs Port of Cebu nawagtang dihang miluwat og kamanduan si Department of Finance Secretary Ceasar Purisima ug BOC Commisioner Ruzzano Rufino "Ruffy" Biazon sa paglahugay sa tanang opisyales sa BOC lukop nasud.
Gumikan niini nahawan usab ang mga lamesa nila sa mga departamento nila sa BOC Cebu. Karong adlawa gitakdang moabot usab ang mga kawani nga gikan sa mga lagyong lugar nga maoy orihinal nga naghupot sa mga posisyon o plantilla dinhi sa Customs Port of Cebu.
Base sa Customs Personnel Order niadtong Septembre 6, ning tuiga gimandoan ang mga empleyado sa BOC sa pagbalik sa ilang kanhing posisyon o plantilla, sugod niadtong Sept. 13 ngadto sa Sept. 27 ning tuiga.
Kinahanglang mohatag sila sa ilang sertipiko sa pag-asumer sa ilang kanhi posisyon ngadto sa ilang BOC - Human Resources Development (HRD) aron dili sila kapasakaan og kaso bahin sa Absent Without Official Leave (AWOL).
Nasuta sa Banat News nga gumikan sa padrino system sa BOC adunay ubang empleyado nga ang orihinal nga plantilla didto sa Luzon ug Mindanao, apan dinhi sa Sugbo idestino.
May mga empleyado usab kansang plantilla dinhi sa Sugbo apan didto idestino sa lagyong dapit. (/WC) (BANAT NEWS)