CEBU, Philippines - Ang City Traffic Operation Management (CITOM) mipahimangno sa mga motorista kabahin sa ipahigayong rerouting sa mga sakyanan karong adlawa diin duha ka national road ang siradohon tungod sa 37th National Milo Marathon.
Ang Osmeña Boulevard, gikan sa dalan P. Del Rosario paingon ngadto sa dalan N. Escario gikan sa dalan Don Gil Garcia hangtud diha sa habig atubangan sa Mc Donald’s sirad-an gikan sa alas 3:00 sa kadlawon hangtud sa pagkahuman sa kalihukan sa marathon. Ang mga Public Utility Jeep (PUJ) nga gikan sa Guadalupe ug Banawa adto kini paagion sa V. Rama Avenue, liko sa wala paingon ngadto sa dalan J. Alcantara o N Bacalso Avenue, liko sa wala ngadto sa dalan P. Del Rosario, liko sa tuo paingon ngadto sa Osmeña Boulevard paingon ngadto sa ilang naandang rota sa Carbon area.
Ang maong mga PUJ sa pagbalik nila samang karsada gihapon ang ilang subayon balik sa ilang gigikanan.
Ang PUJ gikan sa Lahug ug Apas via dalan Escario samtang magsubay diha sa Gorordo Avenue moliko sila diha sa tuo paingon ngadto sa dalan F. Sotto, liko sa tuo paingon ngadto sa General Maxilom Avenue, liko sa wala paingon ngadto sa dalan F. Ramos, liko sa tuo paingon ngadto sa dalan Junquera, liko sa tuo paingon sa dalan Sanciangko balik sa ilang naandang rota ngadto sa Carbon area.
Sa pagbalik mosubay gihapon sila sa maong rota paingon sa ilang point of origin.
Ang mga PUJ nga mopaingon sa Ayala gikan sa Labangon nga dunay rotang 12L samtang magsubay sa N. Bacalso Avenue moderetso kini ngadto sa dalan P. Del Rosario, liko sa wala ngadto sa dalan D. Jakosalem, liko sa wala ngadto sa Echavez extension, liko sa tuo ngadto sa dalan F. Ramos, liko sa tuo ngadto sa Gen. Maxilom Avenue dayon ngadto sa ilang naandang rota sa Ayala.
Gikan sa Ayala deretso kini sa Archbishop Reyes Avenue, liko sa tuo sa dalan F. Sotto ngadto sa Gen. Maxilom Avenue, liko sa wala ngadto sa dalan F. Ramos paingon sa dalan Junquera, liko sa tuo paingon sa dalan P. Del Rosario ngadto sa N. Bacalso Avenue, liko sa tuo ngadto sa V. Rama Avenue, liko sa wala ngadto sa dalan Duterte dayon sa ilang naandang rota paingon sa ilang gigikanan.
Ang mga pribadong sakyanan nga gikan sa V. Rama Avenue makaagi kini ngadto sa dalan Maria Cristina paingon ngadto sa Ayala.
Si Atty. Rafael Yap, acting department head sa CITOM mipahimangno sa mga motorista nga mosubay sa mga traffic sign sa rerouting nga ipangbutang diha sa rerouting area. (BANAT NEWS)