CEBU, Philippines - Namatay gyud alas- 2 kagahapon sa kaadlawon ang magulang nga gikapinusilay sa manghod nga sakop sa Special Weapon and Tactic (SWAT) sa Mandaue City Police Office (MCPO) sa sitio Kalubihan sa barangay Jagobiao alas 3 pasado ang takna sa hapon sa miaging adlaw.
Si Inspector Areston Bataluna, deputy chief sa kapolisan sa Presinto sa MCPO miingon nga namatay mao si Teresito Reagan Ligan alyas Pati, 30, dihang nakigpinusilay sa igsuong si PO1 Teresito Jermaine Ligan kinsa napusilan usab sa walang bitiis ug nalandig sa Chong Hua Hospital. Ang Chief of Staff sa Police Regional Office-7 nga si Sr. Supt. Edward Caranza miingon nga imbestigahon nila kung sakto ba ang aksyon ni PO1 Ligan. Samtang si Supt. Crisaleo Tolentino, hepe sa SWAT sa MCPO miingon nga usa ka lider sa robbery gang ang biktima maong kanunay nalang mabugal-bugalan sa mga kaubang polis si Ligan. Matud pa ni Tolentino lehitimong operasyon ang nahitabo tungod kay miresponde ang SWAT tungod sa tawong nagpabuto og armas apan pag-abot didto ang maguwang diay sa iyang sakop ang suspek.
Giingong nagmagahi si Reagan ug mipusil kaduha sa igsuong polis hinungdan nga kini gibawsan sa tiil apan mihupo maong naigo sa nawong. (/EIM) (BANAT NEWS)