CEBU, Philippines - Namatay ang usa ka lalaki kinsa giingong notado sa pagkalambigit sa illegal drugs human pusila sa wala hiilhing kriminal didto sa dalan Echevarie sa barangay Mantuyong sa dakbayan sa Mandaue sa miaging hapon.
Si PO1 Allan Bacus sa Investigation Detection and Management Bureau (IDMB) sa Mandaue City Police Office (MCPO) miila sa biktima nga mao si Jessie Jakosalem, 34, minyo, nga taga sitio Santo Niño sa barangay Guizo sa maong dakbayan.
Matud pa niya nga nagtan-aw lang sa nagdula og chess nga mga molupyo sa maong dapit ang biktima ug dihang padulong na kini nga mopauli kalit kining gipusil sa wala pa hiilhing lalaki.
Human mahagba sa yuta ang biktima dali usab kaayo nga nakalayas suot sa daghang kabalayan ang kriminal.
Ang biktima nga naigo sa dughan ug uban pang bahin sa lawas dali nga gihatod sa mga silingan ngadto sa Mandaue City Hospital apan gideklarar kini sa mga doktor nga dead on arrival.
Gisulayan unta sa kapolisan ang pagsiksik sa maong lugar apan wala na nila hikit-i ang kriminal.
Ilang gituohan nga nakatago na kini human sa maong pagpamusil.
Si PO1 Bacus miingon nga ilang gituohan nga migamit og .38 kalibre nga armas ang wala hiilhing mamumuno .
Kini base sa napunitan nilang kabhang sa bala didto sa crime scene. Si PO2 Modesto Lutchavez sa kapolisan sa Presinto 1 sa MCPO nga nagbase sa barangay Centro nga nahinabi sa Banat News miingon nga ang namatay ilang nailhan sa maong dapit nga notado sa pagkalambigit sa illegal nga drugas .
Usa kini sa mga anggulo nga ilang gisusi, matud pa ni PO2 Lutchavez. (BANAT NEWS)