CEBU, Philippines - Daghan ang nakugang sa pagpusil patay sa Public Information Officer sa Philippine Drug Enforcement Agency (PDEA) ug anchor man sa DYRC Radyo Kalungsod nga si Jessie Tabanao.
Si Tabanao kanhi tigbalita sa DYMF Bombo Radyo sa wala pa siya motrabaho sa PDEA.
Si Atty. Rhina Seco Padilla, Manila Broadcasting Company (MBC) legal and finance officer, nagkanayon kagahapon sa buntag nga naghuwat pa sila sa resulta sa imbestigasyon sa kapolisan ug sa autopsy sa patay’ng lawas ni Tabanao. Ang DYRC usa ka estasyonan sa MBC. Matud ni Padilla nga si Tabanao nahimong konektado sa DYRC niadtong Marso niining tuiga apan wala sila’y nadawat nga taho kung aduna bay hulga sa iyang kinabuhi.
Matud ni Padilla nga subo kaayo tungod kay giatol pa ang pagpatay kang Tabanao sa pagbukas sa pagsaulog sa Press Freedom Week.
Gituohan nga adunay kalambigitan sa iyang trabaho ang pagpatay kang Tabanao.
Si Tabanao giingong gitakda nga i-assign sa PDEA ngadto sa CARAGA Region apan mihangyo kini nga magpabilin una dinhi sa Sugbo tungod kay nagsabak karon ang iyang asawa
Si Tabanao gipusil sa buko-buko kagahapon sa kaadlawon sa kriminal nga wala pa hiilhi. (Brenda D. Batuto/WC)
Basura misilaob ug nasunog
Naukay niadtong Sabado sa gabii ang mga residente sa usa ka beach resort sa barangay Biasong, dakbayan sa Talisay dihang ang mga basura sa bakanteng lugar atbang niini, misilaob. Si SFO2 Marcelino Aguilar nga nahinabi sa Banat News kagahapon nagkanayon nga nadawat nila ang alarma mga alas 9:10 sa gabii sa nahisgutang adlaw.
Matud ni Aguilar nga ang security guard sa beach resort nga si RJ Gallegas maoy mitawag sa ilang buhatan ug mi-report bahin sa “rubbish fire†o basura nga nasunog .
Gibutyag ni Aguilar nga duha ka fire truck ang mibomba og tubig aron mapawong ang kayo ug wala hinuo’y mga kabalayan nga naapil sa pagkasunog.
Ang mga residente sa maong lugar ilabi na ang tagdumala sa beach resort nabalaka nga motapon ang kayo sa mga kabalayan.
Dugang ni Aguilar nga posibleng adunay nagdaob sa mga basura ug midaku ang kayo o ba kaha adunay upos sa sigarilyo nga nalabay sa pundok sa mga basura.
Hinungdan sa pagsilaob niini tungod sa kainit sa panahon ug sa kauga na niini. (BANAT NEWS)