CEBU, Philippines - Dunay mga Taiwanese nationals nga direkta nga mireklamo ni Mayor Michael Rama tungod sa kabaho sa baligyaanan og mga buwad sa merkado sa Taboan.
Si Mayor Rama mismo maoy mitug-an niini sa mga City Hall reporters nga ipadangat niya kining maong problema ngadto sa mga namaligya og buwad ingon man basin makatabang ang Department of Tourism (DOT) niining maong problema.
Ang pipila ka Taiwanese nakahigayon pagpadangat sa ilang reklamo ngadto sa mayor kay si Rama didto man sa Taiwan mitambong sa Asian Pacific Summit nga gipahigayon sa Taipei, ang kapital nga dakbayan sa Taiwan.
Usa ka Taiwanese official mitug-an ni Rama nga miduaw sila sa Taboan Public Market, ilabi na sa baligyaanan og mga buwad tungod kay ang maong dapit giisip man nga usa sa mga tourist attractions.
Matud sa Taiwanese nga human sa pagbisita nila sa merkado sa Taboan namilit ang baho sa buwad bisan og miabot na sila sa airport pagbalik na nila paingon sa ilang nasud.
Si Rama mitataw nga ang baho sa buwad lisud mahanaw apan posible nga mahimoan kini og sulbad.
Usa sa sulbad ni Rama sa mao nga problema mao nga kadtong mga tawo nga mosulod sa baligyaanan sa mga buwad moagi sila sa usa ka dapit nga posible nga himoon pa, nga mapasiritan sila og pahumot nga makapahanaw sa baho sa buwad. (BANAT NEWS)