CEBU, Philippines - Nabalaka karon ang Malacañang human giingong wala angkona ni Nur Misuari ang nahitabong pag-atake sa Moro National Liberation Front (MNLF) didto sa Zamboanga City.
Sa usa ka press conference kagahapon, si Communications Secretary Ricky Carandang mibutyag nga nakadawat sila og dili kompirmadong report nga si Misuari mihimakak nga iyahang pagbuot ang pag-atake. Ang impormasyong nadawat sa Malacañang matud pa naggikan kang Zamboanga City Mayor Beng Climaco.
"There are many statements that have been attributed to him in the last few weeks, even months, that sometimes they feel convenient—it’s convenient to disown, so I don’t really know whether he said that or not," matud pang Carandang sa report sa GMA News.Tv.
Matud pang Carandang bisan wala siya sa posisyon kung tuohan o dili ang maong panghimakak ni Misuari apan kung ang basehan mao ang mga report gikan sa Zamboanga City, ang tanan nagtumbok kang Misuari nga maoy utok sa maong pag-atake.
"What we believe is that his faction, his group is behind it. So what he’s saying right now, if he’s really saying that, is not consistent with what we know to what happened," sumala pang Carandang.
Laing nakapalibog mao ang managlahing mga pamahayag sa mga nangangkong mga spokesman sa MNLF nga lahi usab og mga pamahayag.
Sayo niini, si Presidente Benigno Aquino III mibutyag nga ang Department of Justice nag-imbestigar na sa maong standoff alang sa posibleng pagpasaka og kaso batok kang Misuari.
Kagahapon, atol sa kainit sa sinukliay sa bala, siyam ka mga hostages sa MNLF ang nakaikyas gikan sa Santa Catalina District, lakip sa mga gi-hostage mao ang mga Muslim ug nasagmuyo sila sa gihimo sa mga rebelde nga misulod sa Mosque nga gidili sa ilang relihiyon.
Usa ka eskuylahan usab ang naugdaw apan human sa pag-atraka sa mga armored personnel carriers sa Army nakalusot ang kabomberohan ug napawong ang kalayo.
Gani usa ka ginang usab ang nakaanak sa evacuation center nga gitabang dayon sa mga volunteers sa Philippine National Red Cross.
Nasulod na sa militar kagahapon ang lugar nga gipundohan sa mga MNLF sukad pa niadtong Lunes.
Dunay mga report nga nanawagan karon ang MNLF og ceasefire ug mihangyo sa Organization of Islamic Conference nga mopatunga sa maong kagubot ug sabotan ang nahitabo. (BANAT NEWS)