CEBU, Philippines - Usa ka lalaking nagmotor ang nakalas ug naangol ang angkas niini dihang misaliring ang ilang gisakyang motorsiklo diha sa Calumboyan lungsod sa Sogod.
Ang namatay naila nga si Antonio Javier, molupyo sa barangay Tabunok sa maong lungsod samtang samaran usab ang angkas niini nga si Ronilo Rivera.
Sa pakighinabi sa Banat News ni PO1 Ervin Joragap sa Sogod Police Station, nasayran nga ang biktima nagmaniho sa iyang motorsiklong XRM nga kolor green gikan sa Borbon patubang sa ilang dapit.
Apan pag-abot sa blind curve nga bahin sa kalsada nawad-an kini og kontrol sa motor ug nabangga sa punoan sa mangga ug misagirit ang drayber nga si Javier og pipila ka metros.
Ang duha ka biktima daling gidala sa Verallo District Hospital apan si Javier gideklarar kini nga dead on arrival tungod sa mga grabing kadaot nga naangkon niini sa kalawasan.
Dako usab ang pagtuo ni Joragap nga kusog ang padagan sa biktima maong nawad-an kini og kontrol sa motor. (EIM) (BANAT NEWS)