CEBU, Philippines - Napisat ang ulo sa usa ka drayber sa traysikol human kini mapiit sa gimaneho niining traysikol dihang nabanggaan kini sa pasaheroang bus didto sa barangay Argawanon lungsod sa San Remegio sa miaging hapon.
Ang namatay nailhan nga si Rodulfo Banzon Jr., 40, molupyo sa barangay Hagnaya sa maong lungsod samtang na-angol usab ang pasahero niini nga sila si Kristel Felix, 32 ug Jennelyn Demiar, 22.
Sa pakighinabi sa Banat News ni SPO1 Joejohnnesky Ynot sa San Remegio Police Station nasayran nga ang namatay’ng biktima nagmaneho sa iyang traysikol sakay ang duha ka pasahero niini nga gikan sa barangay Hagnaya paatubang sa Poblacion.
Samtang ang pasaheroang AutoBus nga gimaneho ni Dolphy Cuambot, 36, patubang usab sa dakbayan sa Sugbo gikan sa Hagnaya.
Matud pa ni Ynot nga sa dihang naabot sa maong dapit ang traysikol ug ang bus giingong misuway unta sa pag-overtake ang bus sa traysikol nga nag-una kaniya.
Apan sa pag-overtake niini giingong naigo ang traysikol sa tuong bahin sa windsheild sa maong bus .
Gumikan sa kakalit nawad-an og control ang traysikol. Busa mitakilid ang traysikol ug kalit nga natumba nga nakapapiit usab sa ulo sa drayber sa atop sa maong traysikol.
Dugang pa ni Ynot nga gawas sa pagkapiit sa ulo sa biktima giingong nabagnos pa usab kini sa sementadong dalan. Ang drayber sa traysikol daling gidala sa Verallo District Hospital apan gideklarar kini nga dead on arrival samtang ang iyang mga pasahero gidala usab sa tambalanan apan anaa na kini sa luwas nga kahimtang.
Kasamtangan usab nga anaa sa kustodiya sa San Remegio Police ang drayber sa Autobus samtang nagpaabot sa tukmang kaso nga isang-at sa pamilya sa biktima. (BANAT NEWS)