CEBU, Philippines - Gikanselar ang mga biyahe sa eroplano tali sa Mactan Cebu International Airport (MCIA) ug Zamboanga gumikan sa nagpadayon nga tension sa dakbayan sa Zamboanga kagahapon.
Matud pa ni Jay Yap ang Duty Branch Manager sa Cebu Pacific Air sa MCIA nga sukad niadtong adlaw’ng Lunes ,ilang gikanselar ang duha ka biyahe niini gikan sa Sugbo paingon ngadto na sa dakbayan sa Zamboanga alang sa pagseguro sa mga pasahero.
Pipila ka pasahero ang wala makasakay ug magpaabot sila kung kanus-a malibkas ang maong suspension sa biyahe.
Si Joel (di tinuod nga ngalan) usa sa pasahero nga nahinabi sa Banat News miingon nga magbarko na lang siya paingon sa Mindanao.
Mag -land trip usab siya sa kabalaka sa iyang pamilya nga tua magpuyo sa dapit diin nahitabo ang enkwentro sa militar ug Moro National Liberation Front (MNLF).
Matud pa ni Yap usa lamang ka flight para sa dakbayan sa Zamboanga busa ang uban misakay na lang sa mga biyahe paingon sa kasikbit nga dapit sa Mindanao nga layo ra sa kagubot karon. (BANAT NEWS)