CEBU, Philippines - Nadakpan sa kapolisan sa lungsod sa Cordova ang most wanted person sa Lapulapu City Police Office (LLCPO) kagahapon sa buntag.
Ang maong wanted nag-atubang og kasong murder nga nagtagotago sulod sa nakalabay nga mga bulan niining tuiga .
Ang nadakpan mao si Ploturco Rosal, 47 anyos, minyo nga taga sitio Ylaya sa barangay Marigondon sa dakbayan sa Lapulapu nga suspetsado sa pagpamusil patay sa maong dapit sa miaging bulan sa Hulyo niining tuiga.
Ang kasong murder maoy giatubang sa maong suspetsado ug si Judge Victor Perez sa Branch 54 sa Regional Trial Court (RTC) 7 maoy nagpagawas sa warrant of arrest batok kaniya.
Si PO2 Noelen Roselosa sa kapolisan sa Cordova Police Station nga nahinabi sa Banat News miingon nga ang suspetsado nga nagtagotago human makapatay sa miaging bulan niining tuiga adunay mga kabanay sa sitio Sun-ok, barangay Ibabao sa maong lungsod.
Kini ang hinungdan nga nagpatabang ang kapolisan sa dakbayan sa Lapulapu sa pagdakop niini pinaagi sa paghatag kanila og kopya sa warrant of arrest nga giluwatan ni Judge Teves.
Dugang pa ni PO2 Roselosa nga dihang ilang nadawat ang taho gikan sa pipila ka molupyo sa maong dapit dali kini nilang gihimoan og pakisusi ug maoy nangulo ang ilang hepe nga si Inspector Julius Ompad ug kauban usab nila si PO2 Harry Espinosa.
Gumikan sa kaabtik sa maong mga polis maoy hinungdan nga nasikop ang maong kriminal. (/WC) (BANAT NEWS)