CEBU, Philippines - Gipangitaan karon og paagi sa kabarangayan sa dakbayan sa Mandaue nga mahimo nilang negosyo ang ilang mga basura.
Kini pinaagi sa paggamit og balik sa mga dili malata sama sa plastic. Ang barangay Pagsabungan ug barangay Tabok migamit sa mga plastic nga bunker fuel pinaagi sa paggaling niini sa ilang makina.
Ang barangay Canduman mihimo usab sa mga plastic sama sa putos sa shampoo, candy ug uban pa nga susama sa maong matang nga unlan ug mga bag.
Si Leo Jabas nga maoy barangay kapitan sa Canduman nakadawat na og pasidungog isip most outstanding barangay captain gikan sa kagamhanan sa maong dakbayan .
Ang pahalipay kang Jabas iyang nadawat atol sa ika-44 ka tuig nga kasaulogan sa Charter Day anniversary niadtong Agosto 30, 2013.
Matud pa ni Jabas nga ang maong mga unlan ug mga bag nga ginama gikan sa plastic nga basura ilang gibaligya sa dagkong mall sa dakbayan sa Mandaue ug dakbayan sa Sugbo.
Samtang ang mga basura nga sagbot sama sa mga utanon ug uban pa, gigaling nila ug gihimong abuno nga gipamaligya usab sa mga dakbayan sa Mandaue ug Cebu. (BANAT NEWS)