CEBU, Philippines - Wala moangkon sa sala nga gipasangil kaniya ang usa ka lider sa Datu Alimaong atol sa arraignment niini niadtong Huwebes didto sa sala ni RTC-7 Branch 12 Judge Estela Alma Sinco.
Si Rudy (di tinuod niyang ngalan), maoy national chairman sa Supreme Council of Datus Alimaong nga nagbase sa barangay Busay syudad sa Sugbo,naglingolingo sa iyang ulo dihang gibasahan sa 5 ka kuwentada sa kasong pagpanglugos nga gipasaka sa usa sa mga sakop niya.
Ang maong sakop giingong nagsilbi isip katabang sa tribal center dinhi sa Sugbo. Ang 19 anyos nga estudyanting biktima nga taga Bukidnon miasoy nga niduol siya sa Supreme Council of Datus Alimaong Tribal Center aron mag- volunteer worker ug nadestino isip katabang sa nahisgutang sentro.
Ang maong estudyante kansang ngalan gipugngan misugilon nga niadtong Marso 25 ug 27 ning tuiga gilugos siya sa suspek samtang siya nag-inusara sa pagkatulog sa kwarto sa mga kabatang ug gihulga nga patyon kini ug ang pamilya niini kun mosumbong sa mga otoridad.
Midugang ang biktima nga giusban siya sa paglugos niadtong Abril 1, 20 ug 28 hinungdan nga milayas kini niadtong Mayo 4.
Nagpahiling kini sa hospital sa Cagayan de Oro ug nagpakitabang sa Criminal Intelligence and Detection Group (CIDG-7) hinungdan nga nasikop ang suspetsado ug gipasakaan og kaso.
Sa pagkakaron gipriso na ang maong suspek.(/WC) (BANAT NEWS)